دي تجربتي في الشراء من على اكسبرس بالتفصيل، أنا معايا كيا سيراتو 2010 وكنت محتاج هوايات تكييف (2 في الوسط بس مش طقم كامل زي الصورة اللي تحت) وبحثت عنهم كتير في الاستيراد والجديد ولكن للأسف مفيش غير طقم كامل.
بحثت كتير أونلاين في مصر وبرضو مفيش، وفي الأخر لقيتهم على موقع على إكسبرس بسعر 40 دولار تقريبا فقولت أجرب اشتري وأشوف هتكلفني كام.
طبعا بحثت كتير جدا في على اكسبرس عن الهوايات عند أكثر من بائع عشان أشوف أقل سعر ويكون تقييم كويس وفي الاخر لقيتهم ب40 دولار، وكمان موقع على اكسبرس كان موفرلي كوبون خصم بقيمة 6 دولار عشان دي أول مره أشتري منه.
ده لينك الموقع www.aliexpress.com
ملحوظة مهمه جدا: متنساش تشوف مصاريف الشحن واللي في أحيان كتير هتلاقي مصاريف الشحن بتكلف أكتر من تمن المنتج نفسه، فمثلا كنت بدور على فرش كرسي للعربيه ولقيت حجات ب 6 دولار بس الشحن بتاعها كان 20 دولار.
أول حاجه ضفت المنتج لعربة التسوق وبعدين تأكيد للشراء واستخدمت فيزة البنك بتاعتي واشتريت يوم 7.9.2022 وتم خصم المبلغ بالجنيه (مش فاكر الدولار كان بكام ساعتها) وبعدين الشحن وصلتني يوم 28.9.2022 عن طريق البريد ودفعت 100 جنيه جمارك ومصاريف شحن.
خلي بالك: لو هتشتري حاجه فيها بلوتوث أو GPS هتحتاج تبعت صورة البطاقة بتاعتك للبريد وصورة الشحنه ومواصفاتها الفنيه والبريد هيبعتها لجهة معينة لفحص الشحنه (عرض اتصالات).
نصيحة: ابحث عن أي حاجه انت عايزها على المتاجر الالكترونيه في بلدك وشوف الأسواق ومتشتريش من اي موقع الا لو مضطر عشان الجمارك ممكن تكون أكتر من سعر المنتج نفسه (ليا تجربة تانيه اشتريت سماعه بلوتوث والجمارك كانت أكتر من سعر السماعه للأسف)
الصور دي من موقع على اكسبرس للمنتج اللي اشتريته.
